Gamla ljósmyndin: Markinu lokað
Setja bókamerki
/frimg/1/53/79/1537941.jpg)
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Á fimmtán ára tímabili komu tvö mögnuð velgengnisskeið hjá Fram með Kolbrúnu Jóhannsdóttur á milli stanganna. Liðið varð Íslandsmeistari sex ár í röð frá 1975-1980 og aftur frá 1984-1990.
Kolbrún var framúrskarandi leikmaður í íslensku deildinni og má undirstrika það með þeirri staðreynd að fjórum sinnum var hún valin besti leikmaður Íslandsmótsins: 1977, 1985, 1987 og 1988.
Árið 1987 kusu leikmenn í fyrsta skipti leikmann ársins og varð Kolbrún því fyrst til að hljóta þann heiður. Var hún sem sagt kjörin aftur árið eftir. Í fyrri tvö skiptin var valnefnd fyrrverandi landsliðskvenna sem sá um að velja besta leikmanninn.
Meðfylgjandi mynd er tekin á lokahófi HSÍ á Hótel Borg vorið 1985 þegar Kolbrún veitir viðurkenningunni viðtöku. Í umfjöllun Morgunblaðsins kemur fram að Kolbrún hafi fengið gjafabréf frá Arnarflugi i verðlaun ásamt styttunni sem hún heldur á. Helga Magnúsdóttir lýsti kjörinu en hún átti löngu síðar eftir að setjast í stjórn Handknattleikssambands Evrópu. Á milli þeirra er Ólafur Jónsson landsliðsmaður úr Víkingi. Lengst til vinstri er þjóðþekktur tónlistarmaður, Jón Ólafsson. Myndina tók Friðþjófur Helgason og birtist hún í Morgunblaðinu hinn 3. maí 1985.
Auðvelt væri að tína til marga stórleiki hjá Kolbrúnu enda var frammistöðu hennar oft lýst þannig í fjölmiðlum að hún hafi lokað markinu. Ein athyglisverðasta frammistaða Kolbrúnar kom gegn sænska liðinu Stockholm Polizen í Evrópukeppni meistaraliða árið 1990. Kolbrún fékk aðeins á sig 18 mörk og Fram sigraði með átta marka mun og komast áfram í næstu umferð keppninnar. Í Frambókinni sem Stefán Pálsson ritaði kemur fram að forráðamenn Fram höfðu eftir sænska landsliðsþjálfaranum sem sótti leikinn að Kolbrún væri besti markvörður heims.
A-landsleikir Kolbrúnar urðu 83 talsins en hún var fyrsti markvörður landsliðsins um árabil. Kolbrún lék allan sinn feril með Fram. Leikir hennar fyrir meistaraflokk félagsins urðu á sjöunda hundraðið þegar upp var staðið sem er væntanlega með því mesta sem þekkist hérlendis.
„Við munum grípa inn í“
Sex fluttir með þyrlunni og þar af eitt barn
Heitar sturtur skaðlegar: Mælt með moðvolgu vatni
Mistókst að ræna hraðbanka
300 tonn af búslóðum Grindvíkinga beint á haugana
Skoða ráðstafanir vegna mikillar kuldaspár
Úkraínumenn handtóku norðurkóreskan hermann