Viggó lét Kiel hafa fyrir hlutunum

Viggó Kristjánsson átti stórleik leik fyrir Stuttgart gegn stórliðinu Kiel í Wunderino-höllinni glæsilegu í Kiel í þýsku 1. deildinni í handknattleik í kvöld. 

Kiel hafði betur 35:31 en Viggó var markahæstur hjá Stuttgart með 8 mörk og gaf einnig 10 stoðsendingar. 

Fleiri Íslendingar léku gegn stórliði á útivelli því Íslendingaliðið Melsungen mætti Flensburg. Þar vann Flensburg 27:24 og skoraði Teitur Örn Einarsson 5 mörk fyrir Flensburg.  Elvar Örn Jónsson sveitungi hans frá Selfossi skoraði einnig 5 mörk fyrir Melsungen og Arnar Freyr Arnarsson skoraði 2 mörk og gaf eina stoðsendingu. Alexander Petersson kom einnig við sögu hjá Melsungen en skoraði ekki. 

Elliði Snær Viðarsson hjá Gummersbach og Elvar Örn Jónsson og Arnar Freyr Arnarsson hjá Melsungen voru áberandi í kvöld. mbl.is/Kristinn Magnússon

Ýmir Örn Gíslason var á sínum stað í vörninni hjá Rhein Neckar Löwen sem tapaði illa fyrir Erlangen á útivelli 36:26. 

Í næstefstu deild vann Gummersbach stórsigur gegn Ferndorf 42:25 á heimavelli undir stjórn Guðjóns Vals Sigurðssonar.  Óðinn Þór Ríkharðsson skoraði 7 mörk fyrir Gummersbach og hefur stimplað sig hratt inn hjá liðinu. Elliði Snær Viðarsson skoraði 5 mörk og gaf tvær stoðsendingar. 

• Blogga um frétt