Hefur leikið sinn síðasta leik í Danmörku

Handknattleiksmaðurinn Sveinn Jóhannsson hefur leikið sinn síðasta leik fyrir danska félagið SönderjyskE. Þetta staðfesti hann í samtali við handbolta.is.

Sveinn, sem er 22 ára gamall, meiddist á hné á æfingu íslenska karlalandsliðsins í byrjun janúar í aðdraganda Evrópumótsins 2022 sem fram fór í Ungverjalandi og Slóvakíu.

Hann þurfti að draga sig úr landsliðshópnum af þeim sökum og verður frá næstu mánuðina.

„Hnéskelin fór úr lið og síðan þurfti að gera við brjóskskemmdir í leiðinni. Ég verð því miður frá keppni í sex mánuði,“ sagði Sveinn í samtali við handbolta.is.

Samningur Sveins við SönderjyskE rennur út í sumar og mun hann þá ganga til liðs við þýska 1. deildarfélagið Erlangen.

• Blogga um frétt