Fram sterkari á lokamínútunum

Vilhelm Poulsen átti frábæran leik fyrir Fram þegar liðið vann tveggja marka sigur gegn Gróttu í úrvalsdeild karla í handknattleik, Olísdeildinni, í Framhúsi í Safamýri í 14. umferð deildarinnar í kvöld.

Leiknum lauk með 29:27-sigri Fram en Poulsen var markahæstur Framara með 9 mörk.

Jafnræði var með liðunum í upphafi leiks en Framarar voru sterkari þegar leið á leikinn og leiddu 16:12 í hálfleik.

Framarar voru með þægilegt forskot stærstan hluta síðari hálfleiks en Gróttu tókst að minnka muninn í eitt mark þegar tíu mínútur voru til leiksloka, 23:24.

Liðin skiptust á að skora og var staðan 27:26, Fram í vil, þegar þrjár mínútur voru til leiksloka. Framarar voru hins vegar sterkari á lokamínútunum og fögnuðu sigri.

Þorsteinn Gauti Hjálmarsson skoraði átta mörk fyrir Fram og Lárus Helgi Ólafsson varði 11 skot í markinu.

Birgir Steinn Jónsson var markahæstur í liði Gróttu með 7 mörk og Ólafur Brim Stefánsson skoraði 6 mörk.

Framarar eru áfram í níunda sæti deildarinnar með 12 stig, líkt og KA og Afturelding, en liðin heyja harða baráttu um sæti í úrslitakeppninni. Grótta er hins vegar í tíunda sætinu með 7 stig.

• Blogga um frétt