Arnór og Agnar framlengja við bikarmeistarana

Örvhentu skytturnar Arnór Snær Óskarsson og Agnar Smári Jónsson hafa báðir skrifað undir framlengingu á samningum sínum við nýkrýnda bikarmeistara Vals í handknattleik karla.

Báðir eru þeir uppaldir Valsmenn.

Arnór Snær skrifar undir þriggja ára samning við Val sem gildir út tímabilið 2025. Arnór var um helgina valinn mikilvægasti leikmaður Vals á úrslitahelgi Coca Cola-bikarsins þegar Valur varði bikartitil sinn.

„Arnór hefur farið úr því að vera lykilmaður í yngri flokkum félagsins í að vera einn besti leikmaður meistaraflokks á nokkrum árum. Arnór hefur einnig getið af sér gott orð við þjálfun yngri flokka félagsins og er fyrirmyndar félagsmaður,“ sagði í tilkynningu frá handknattleiksdeild Vals.

Agnar Smári Jónsson skrifar undir tveggja ára samning við félagið sem gildir út leiktíðina 2024.

Agnar Smári Jónsson heldur sömuleiðis kyrru fyrir hjá Val. mbl.is/Unnur Karen

„Agnar Smári hefur um árabil verið einn besti leikmaður deildarinnar og verið lykilmaður í titilbaráttu sinna liða og fór til að mynda á kostum þegar Valsmenn tryggðu sér Íslandsmeistaratitilinn á Ásvöllum í fyrra,“ sagði ennfremur í tilkynningunni.

• Blogga um frétt