Færeyska stjarnan lengi frá keppni

Fær­ey­ing­ur­inn Eli­as Ell­ef­sen á Skipa­götu, sem er tal­inn einn efni­leg­asti hand­boltamaður Evr­ópu um þess­ar mund­ir, er úr leik vegna hnjá­meiðsla og verður frá keppni fram í fe­brú­ar eft­ir að hafa geng­ist und­ir upp­skurð.

Eli­as leik­ur með Sävehof í sænsku úr­vals­deild­inni, eins og Sel­fyss­ing­ur­inn Tryggvi Þóris­son, og var val­inn besti miðjumaður deild­ar­inn­ar á síðasta keppn­is­tíma­bili, ásamt því sem leik­menn deild­ar­inn­ar kusu hann besta leik­mann­inn. Hann kom til fé­lags­ins fyr­ir tveim­ur árum og þýska stórliðið Kiel hef­ur þegar tryggt sér krafta hans frá og með sumr­inu 2023.

Eli­as, sem er aðeins tví­tug­ur, sló í gegn með fær­eyska landsliðinu í undan­keppni EM á síðasta ári og átti drjúg­an þátt í sænsk­um meist­ara­titli Sävehof vorið 2021, á sínu fyrsta tíma­bili með liðinu.

Þjálf­ari Sävehof, Michael App­legren, seg­ir við Aft­on­bla­det að meiðslin hjá Fær­ey­ingn­um sé gríðarlegt áfall fyr­ir liðið og komi í kjöl­farið á mik­illi meiðslahrinu hjá liðinu.

• Blogga um frétt