Öruggt hjá Selfossi og ÍR

Selfoss vann öruggan sigur á FH, 34:25, þegar liðin áttust við í fyrsta leik í undanúrslitum umspils um sæti í úrvalsdeild á Selfossi í kvöld.

Töluvert jafnræði var með liðunum í fyrri hálfleik áður en Selfoss sigldi aðeins fram úr undir lok hans og leiddi með fjórum mörkum, 17:13, í hálfleik.

Í síðari hálfleik juku Selfyssingar forskotið jafnt og þétt og unnu að lokum einkar þægilegan níu marka sigur.

Katla María Magnúsdóttir átti stórleik í liði Selfoss er hún skoraði níu mörk.

Cornelia Hermansson lék þá afar vel í markinu og varði 12 skot. Var hún með rúmlega 34 prósent markvörslu.

Hjá FH átti Hildur Guðjónsdóttir sömuleiðis stórleik og skoraði einnig níu mörk.

Selma Þóra Jóhannsdóttir varð 13 skot í marki Hafnfirðinga og var með 29,5 prósent markvörslu.

Liðin mætast næst í Kaplakrika á miðvikudagskvöld, en vinna þarf tvo leiki til þess að tryggja sér sæti í úrslitaleik umspilsins.

Tólf marka sigur ÍR

ÍR og Grótta eru hin liðin í umspilinu og mættust fyrr í dag. ÍR vann öruggan 32:20-sigur í Breiðholti.

Karen Tinna Demian skoraði sjö mörk fyrir ÍR. Hildur Öder Einarsdóttir átti magnaðan leik í markinu og varði 18 skot.

Katrín Helga Sigurbergsdóttir skoraði þá sjö mörk fyrir Gróttu.

Liðin mætast aftur á Seltjarnarnesi á miðvikudagskvöld.

Selfoss lék í úrvalsdeild á liðnu tímabili en hafnaði þar í næstneðsta sæti og tekur því þátt í umspili með þremur liðum úr næstefstu deild.

• Blogga um frétt