Elliði stórgóður í Þýskalandi

Landsliðsmaðurinn Elliði Snær Viðarsson átti stórleik fyrir Gummersbach í heimasigri á Wetzlar, 37:30, í þýsku 1. deildinni í handbolta í dag. 

Elliði skoraði sjö mörk og var næst markahæsti maður leiksins. Liðsfélagi hans Hákon Daði Styrmisson lagði eitt upp en Guðjón Valur Sigurðsson er þjálfari liðsins. Gummersbach er í 10. sæti með 26 stig. 

Gísli Þorgeir Kristjánsson skoraði fimm mörk í eins marks sigri Magdeburg á Hannover-Burgdorf þar sem Heiðmar Felixsson er aðstoðarþjálfari. 

Ómar Ingi Magnússon er, eins og flestum er kunnugt, meiddur en Hollendingurinn Kay Smiths hefur heldur betur stigið upp í fjarveru hans og skoraði til að mynda 11 mörk í dag. 

Magdeburg er ásamt Kiel og Füchse Berlín í toppsætum deildarinnar, öll með 43 stig. Berlínarliðið vann Ými Örn Gíslason og liðsfélaga hans í RN Löwen sannfærandi, 38:24, í dag. 

Að lokum skoraði Sveinn Jóhannsson eitt mark fyrir Minden í tapi liðsins gegn Erlangen, 28:29, þar sem Ólafur Stefánsson er aðstoðarþjálfari. Minden er í næstneðsta sæti með 11 stig. 

• Blogga um frétt