Guðmundur fær okkur til þess að trúa

Thorsten Fries, markvörður danska handknattleiksfélagsins Fredericia, segir að Guðmundur Þórður Guðmundsson, þjálfari liðsins, fái leikmenn liðsins til þess að trúa því að þeir geti unnið hvaða lið sem er í heiminum.

Guðmundur Þórður tók við þjálfun danska liðsins síðasta sumar en liðið er í vænlegri stöðu í 2. sæti 2. riðils úrslitakeppninnar þegar ein umferð er eftir af riðlakeppninni.

Fredericia endaði í 7. sæti dönsku úrvalsdeildarinnar eftir erfiða byrjun á tímabilinu og áttu fæstir von á því í vetur að liðið ætti raunhæfa möguleika á því að leika til undanúrslita um danska meistaratitilinn.

Náði okkur niður á jörðina

„Við trúum því að við getum unnið hvaða mótherja sem er,“ sagði Fries í samtali við Fredericia Dagblad.

„Guðmundur hefur mikinn sigurvilja, sem smitar út frá sér, og hann fær okkur til þess að trúa. Við vorum ansi ánægðir með okkur þegar við mættum á fyrstu æfinguna okkar eftir að við höfum tryggt sæti okkar í úrslitakeppninni.

Guðmundur var hins vegar fljótur að ná okkur niður á jörðinn og talaði um að núna værum við á leið í undanúrslitin,“ bætti Fries við.

• Blogga um frétt