Íþróttir | Handbolti | mbl | 22.6.2023 | 11:29 | Uppfært 15:34

Gísli Þorgeir frá í hálft ár?

Gísli Þorgeir Kristjánsson er á leið í aðgerð. AFP

Handboltamaðurinn Gísli Þorgeir Kristjánsson er á leið í aðgerð eftir að hann fór úr axlarlið í leik Magdeburgar og Barcelona í undanúrslitum Meistaradeildarinnar í Köln um síðustu helgi.

Synir Íslands: Gísli Þorgeir Kristjánsson

Þetta tilkynnti Bennet Wiegert, þjálfari Magdeburgar, í samtali við þýska miðilinn Bild en þrátt fyrir meiðslin lék Gísli Þorgeir úrslitaleikinn gegn Kielce, þar sem Magdeburg vann nauman sigur.

Tárin fossuðu út úr augunum á mér

Þá var íslenski leikstjórnandinn valinn besti leikmaður úrslitahelgarinnar en þetta er í þriðja sinn sem hann fer úr lið á hægri öxlinni.

Stefnir á aðgerð í næstu viku

„Vonandi kemst hann í aðgerð í næstu viku,“ sagði Wiegert í samtali við Bild.

„Hann stjórnar því sjálfur hvar og hjá hverjum hann fer í aðgerð. Ég get hins vegar ekki sagt til um það hversu lengi hann verður frá.

Við þurfum að bíða og sjá,“ bætti Wiegert við, en fari svo að hann verði frá í sex mánuði ætti hann að vera orðinn klár í slaginn þegar íslenska liðið heldur til Þýskalands á Evrópumótið í janúar á næsta ári.