Þrír Íslendingar í sitthvorum riðli Meistaradeildarinnar

Gísli Þorgeir Kristjánsson og Ómar Ingi Magnússon, leikmenn Evrópumeistara Magdeburgar, munu mæta Bjarka Má Elíssyni og félögum í Veszprém í riðlakeppni Meistaradeildar Evrópu í handknattleik karla á næsta tímabili.

Dregið var í riðla Meistaradeildarinnar í Vín í Austurríki í morgun.

Þýska liðið Magdeburg, sem vann keppnina á dögunum eftir ótrúlega framgöngu Gísla Þorgeirs Kristjánssonar í úrslitaleiknum gegn Kielce, dróst í B-riðil ásamt ungversku meisturunum í Veszprém.

Í riðlinum eru einnig dönsku meistarararnir í GOG, Spánarmeistarar Barcelona, pólska liðið Wisla Plock, franska liðið Montpellier, portúgölsku meistararnir í Porto og slóvensku meistararnir í Celje.

Í A-riðlinum koma þrír Íslendingar til viðbótar til með að etja kappi.

Janus Daði Smárason, Sigvaldi Björn Guðjónsson og liðsfélagar þeirra hjá Noregsmeisturum Kolstad drógust í A-riðil ásamt pólsku meisturunum í Kielce, þar sem Haukur Þrastarson er á mála.

Frakklandsmeistarar Parísar Saint-Germain og Þýskalandsmeistarar Kiel eru einnig í riðlinum ásamt króatísku meisturunum í Zagreb, norður-makedónsku meisturunum í Eurofarm Pelister, danska liðinu Aalborg og ungverska liðinu Pick Szeged.

Morgunljóst er því að báðir riðlar eru ógnarsterkir.

A-riðill:

Kielce

PSG

Kiel

Zagreb

Aalborg

Pick Szeged

Eurofarm Pelister

Kolstad

B-riðill:

GOG

Veszprém

Barcelona

Magdeburg

Wisla Plock

Montpellier

Porto

Celje

• Blogga um frétt