„Við vorum ekki nægilega góðir“

Snorri Steinn Guðjónsson þjálfari íslenska landsliðsins í handbolta var ekki jafn kátur með leikinn í kvöld og í gær. Hann var þó ánægður með að hafa unnið báða leikina.

Frétt af mbl.is

Ísland marði sigur í seinni leiknum

Fundu ekki svör

„Þetta var hörkuleikur. Mjög erfiður leikur. Við vorum ekki nægilega góðir í kvöld. Þeir gera vel með að spila 7 á 6 allan leikinn og þeir gera það vel. Við náum ekki að finna nægilega góð svör við þeirra sóknarleik.

Á sama tíma eru þeir að fá fín færi og markverðirnir okkar að fá erfið skot á sig. Þeir stjórnuðu hraðanum í dag en við í gær og við vorum bara ekki í nægilega góðum takti,“ segir Snorri í samtali við mbl.is.

Elias Ellefsen á Skipagötu skoraði 6 mörk fyrir Færeyinga í dag. Ljósmynd/Kristinn Steinn

Ekki spurning um þreytu

Voru menn þreyttir eftir gærdaginn?

„Nei ég vill ekki meina það. Við rúlluðum vel á liðinu bæði í gær og í dag og strákarnir eru í mjög góðu formi. Nei það var engin þreyta.

Leikurinn var hægari sem er oft raunin þegar lið spila 7 á 6. Þetta voru fínir leikir og fullt sem við þurfum að skoða og laga. Það er núna verkefnið að skoða það allt.“

Mæta tilbúnir í æfingaleikina í janúar

Er margt sem þarf að skoða og laga eftir þetta verkefni?

„Já alveg pottþétt og við sjáum það ekki bara í leikjunum heldur líka á æfingum. Núna tekur bara við sú vinna að kryfja allt betur og sjá hvað var gott og hvað var ekki eins gott.

Síðan mætum við tilbúnir í æfingaleikina 6. og 8. janúar gegn Austurríki.“

• Blogga um frétt