Landsliðsmennirnir fóru á kostum í Evrópudeildinni

Viktor Gísli Hallgrímsson og Orri Freyr Þorkelsson, landsliðsmenn í handknattleik, fóru fyrir liðum sínum í sterkum sigrum í riðlakeppni Evrópudeildarinnar í handknattleik í kvöld.

Viktor Gísli lék frábærlega í marki Nantes sem hafði betur gegn Rhein-Neckar Löwen, 32:25, í A-riðli.

Hann varði alls 15 skot og var með tæplega 38 prósenta markvörslu.

Arnór Snær Óskarsson og Ýmir Örn Gíslason komust ekki á blað hjá Löwen.

Nantes tryggði sér sigur í A-riðli með því að vinna í kvöld en bæði lið fara áfram í 16-liða úrslit með tíu stig.

Orri Freyr var þá markahæstur allra í 34:28-sigri Sporting á CSM Constanta í H-riðli.

Skoraði hann átta mörk úr jafnmörgum skotum.

Constanta vann riðilinn með níu stigum og Sporting kom þar á eftir með átta.

Í E-riðli hafði Elverum betur gegn Kadetten Schaffhausen, 31:27.

Óðinn Þór Ríkharðsson skoraði fjögur mörk fyrir Kadetten.

Flensburg vann riðilinn en Kadettend fylgir þýska liðinu í 16-liða úrslit.

Loks hafði Hannover-Burgdorf betur gegn Gornik Zabrze, 31:29.

Heiðmar Felixson er aðstoðarþjálfari Hannover, sem vann riðilinn og fer í 16-liða úrslit ásamt Zabrze.

• Blogga um frétt