Framarar sterkari í lokin á Nesinu

Framarar knúðu fram sigur á Gróttu í hörkuleik í úrvalsdeild karla í handknattleik á Seltjarnarnesi í kvöld, 30:28.

Fram er þá komið með 15 stig í fimmta sæti deildarinnar en Grótta er áfram með 8 stig í áttunda sætinu.

Grótta var með undirtökin í byrjun og komst í 6:3 en Framarar jöfnuðu fljótlega í 6:6. Eitt til tvö mörk skildu liðin að út fyrri hálfleikinn en Grótta  var yfir, 17:16, að honum loknum.

Framarar skoruðu þrjú fyrstu mörk síðari hálfleiks og komust í 19:17 og síðan í 23:19. Munurinn hélst síðan tvö til fjögur mörk, Frömurum í hag, fram á lokamínúturnar.

Gróttu tókst að jafna í fyrsta sinn í hálfleiknum, 28:28, þegar þrjár mínútur voru eftir. Framarar svöruðu með tveimur mörkum, 30:28, og það urðu lokatölurnar.

Reynir Þór Stefánsson skoraði 8 mörk fyrir Fram, Þorsteinn Gauti Hjálmarsson 7 og Tryggvi Garðar Jónsson 6.

Ágúst Ingi Óskarsson skoraði 7 mörk fyrir Gróttu, Lúðvík Thorberg Arnkelsson 5 og Elvar Otri Hjálmarsson 4.

• Blogga um frétt