Sænski handknattleiksmarkvörðurinn Mikael Aggefors hefur tekið skóna af hillunni og samið við Evrópumeistara Magdeburg um að leika með liðinu út yfirstandandi tímabil.
Hinn 39 ára gamli Aggefors lagði skóna á hilluna eftir síðasta tímabil en hefur þekkst boð um að hlaupa í skarðið hjá Íslendingaliði Magdeburg.
Samdi þýska félagið við Svíann vegna þess að svissneski markvörðurinn Nikola Portner var í vikunni settur til hliðar eftir að hafa fallið á lyfjaprófi, sem kveikti tafarlausa þörf fyrir nýjan markvörð.
Mun Portner ekki æfa né spila með Magdeburg á meðan rannsókn á máli hans stendur yfir.
Aggefors gat samið við Magdeburg utan félagaskiptaglugga þar sem hann var félagslaus, en sænski markvörðurinn lék með danska stórliðinu Aalborg frá 2016 til 2023.