Gamla ljósmyndin: Þekkt nöfn í 2. deild
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Þessi dagskrárliður fór í loftið á mbl.is fyrir fjórum árum eða í lok mars árið 2020. Fyrsta myndin var af Alberti Guðmundssyni fyrsta atvinnumanni þjóðarinnar í knattspyrnu.
Birtar hafa verið myndir eftir marga ljósmyndara sem komið hafa við sögu á Morgunblaðinu og mbl.is og mörgu af þekktasta íþróttafólki landsins hefur brugðið fyrir á myndunum. Til þessa hafa myndirnar eða fólkið á myndunum tengst eftirtöldum íþróttagreinum: Knattspyrnu, frjálsum, handknattleik, fimleikum, sundi, júdó, körfuknattleik, tennis, golfi, borðtennis, badminton, alpagreinum skíðaíþrótta, hestaíþróttum, kraftlyftingum, rallý, blaki, snóker, siglingum og hjólreiðum.
Meðfylgjandi mynd var tekin af Sigurgeiri Jónassyni í Vestmannaeyjum á níunda áratugnum. Sigurgeir myndaði fyrir Morgunblaðið í liðlega sextíu ár og er á nítugasta aldursári.
Þarna eigast við Þór í Vestmannaeyjum og Breiðablik í 2. deild karla en liðin voru í baráttunni um að komast upp í efstu deild.
Á myndinni eru leikmenn sem áttu eftir að setja mikinn svip á íþróttina hérlendis, ekki síst í þjálfun. Theodór Guðfinnsson leikmaður Breiðabliks er að brjótast í gegn og kominn í skotstöðu en samherji hans Kristján Halldórsson fylgist grannt með.
Í vörninni eru frá vinstri Þorbergur Aðalsteinsson, Gylfi Birgisson og Ragnar Hilmarsson.
Theodór og Kristján þjálfuðu báðir kvennalandsliðið á tíunda áratugnum og Þorbergur Aðalsteinsson karlalandsliðið. Ragnar var aðstoðarþjálfari ÍBV þegar liðið vann frækinn sigur í bikarkeppninni árið 1991 (þjálfarinn Sigurður Gunnarsson lék einnig með liðinu.)
Theodór þjálfaði sterk lið Vals og Víkings um tíma og Kristján stýrði einu sterkasta kvennaliði í Evrópu á þeim tíma, Larvik í Noregi. Þorbergur er einn þeirra leikmanna sem léku undir stjórn Bogdans bæði hjá Víkingi og í landsliðinu eins og handboltaunnendur þekkja. Hann þjálfaði Saab í Svíþjóð um tíma. Gylfi Birgisson lék um tíma í Noregi og varð bikarmeistari með bæði Stjörnunni og ÍBV.
Umspil um sæti í efstu deildum karla og kvenna stendur nú yfir í handboltanum.
„Erum í miðri hrinu“: Styttist í Eldvörp
Erlendir miðlar greina frá tíunda gosinu
Mæðgur dæmdar til að greiða 64 milljónir
Hraunið við bílastæði Bláa lónsins
„Má segja að þetta gos hafi þjófstartað“
Hraun fór yfir Grindavíkurveg
Hluti bílastæðis undir hraun: Ómögulegt að meta tjón