Ísland og Portúgal skildu jöfn, 33:33, í gríðarlega spennandi leik í úrslitakeppni átta liða úm Evrópumeistaratitil karla 20 ára og yngri í handknattleik í Celje í Slóveníu í dag.
Íslenska liðið sýndi mikla seiglu á lokamínútunum þegar það vann fyrst upp fjögurra marka forskot Portúgala, úr 31:27 í 31:31, og svo úr 33:31 í 33:33. Skarphéðinn Ívar Einarsson jafnaði þegar sex sekúndur voru til leiksloka.
Portúgalar kræktu sér hins vegar í vítakast á síðustu sekúndu leiksins og gátu tryggt sér sigurinn en Ísak Steinsson í marki Íslands gerði sér lítið fyrir og varði frá Correia Ferreira og tryggði Íslandi dýrmætt stig.
Ísland varð þar með fyrsta liðið til að taka stig af sterku liði Portúgals á þessu móti.
Elmar Erlingsson var markahæstur íslensku strákanna með 7 mörk en Össur Haraldsson og Reynir Þór Stefánsson skoruðu fjögur mörk hvor. Ísak varði 10 skot í markinu og var með 30 prósent markvörslu.
Spánn vann Austurríki, 37:26, í hinum leik riðilsins í dag og staðan er því tvísýn eftir fyrstu umferðina en tvö efstu lið riðilsins komast í undanúrslit. Ísland mætir Austurríki á morgun og Spáni á fimmtudag.