Valsmenn verða með Porto frá Portúgal, Vardar Skopje frá Norður-Makedóníu og Melsungen frá Þýskalandi eða Elverum frá Noregi ef þeir vinna króatíska liðið Spacva Vinkovci í undankeppni Evrópudeildarinnar í handbolta.
Dregið var í riðla í dag en Valur mætir Spacva í tveimur leikjum. Sá fyrri fer fram 31. ágúst á Hlíðarenda og síðari 7. september ytra.
Ef Valur vinnur bíða Porto, þar sem að Þorsteinn Leó Gunnarsson spilar, Vardar sem er stórlið frá Norður-Makedóníu og Melsungen, þar sem Elvar Örn Jónsson og Arnar Freyr Arnarsson spila, eða Elverum en þau fara einnig í undankeppnina.