Leikur Hafsteinn Óli gegn Íslandi á HM?

Handboltamaðurinnn Hafsteinn Óli Ramos Rocha leikur líklega með landsliði Grænhöfðaeyja á næsta heimsmeistaramóti.

Gangi það eftir mun hann leika þar gegn landsliði Íslands.

Hafsteinn Óli er fæddur á Íslandi en er ættaður frá Grænhöfðaeyjum og hefur leikið með yngri landsliðum Íslands. Hann hefur leikið með Fjölni, HK og Aftureldingu og gekk í raðir Gróttu í sumar.

Fjölmiðillinn Criolosports á Grænhöfðaeyjum skýrir frá þessu og segir að þessi hávaxni 24 ára gamli leikmaður sé nú staddur í Sao Vicente á eyjunum þar sem hann sé að fá í gegn ríkisborgararétt þar.

Lið Grænhöfðaeyja kemur saman í nóvember fyrir lokaundirbúning sinn fyrir HM 2025 sem fer fram í Króatíu, Danmörku og Noregi í janúarmánuði.

Grænhöfðaeyjar eru í G-riðli keppninnar ásamt Íslandi, Slóveníu og Kúbu og fyrsti leikurinn er einmitt á milli Íslands og Grænhöfðaeyja í Zagreb í Króatíu 16. janúar.

• Blogga um frétt