Rúnar Sigtryggsson, þjálfari karlaliðs Leipzig í handknattleik, hefur skrifað undir nýjan samning við félagið sem gildir til loka tímabilsins 2026-27.
Fyrri samningur Rúnars átti að renna út næsta sumar.
Rúnar hefur þjálfað Leipzig frá því í nóvember árið 2022 þegar hann tók við liðinu í erfiðri stöðu við botninn í þýsku 1. deildinni.
Rétti Rúnar gengi liðsins við svo um munaði og hafnaði Leipzig að lokum í 11. sæti. Á síðasta tímabili hélt liðið áfram að bæta sig og hafnaði í áttunda sæti deildarinnar.
Leipzig er Íslendingalið þar sem Viggó Kristjánsson og Andri Már Rúnarsson, sonur Rúnars, leika með því.