Íslenska drengjalandsliðið í handknattleik skipað leikmönnum 18 ára og yngri tryggði sér sæti í undanúrslitum EM 2024 í Podgorica í Svartfjallalandi í dag með því að leggja Noreg örugglega að velli, 31:25, í lokaumferð milliriðils H.
Með sigrinum tryggði Ísland sér sæti í undanúrslitum mótsins þar sem liðið mætir annað hvort Ungverjalandi, Danmörku eða Serbíu.
Svíþjóð vann milliriðil H og Ísland hafnaði í öðru sæti. Spánn situr hins vegar eftir með sárt ennið eftir tap fyrir Svíþjóð í dag, en öll liðin enduðu með fjögur stig.
Íslensku drengirnir mættu ákveðnir til leiks í dag og náðu fljótt undirtökunum. Þegar leið á fyrri hálfleikinn jókst forysta Íslands jafnt og þétt og varð munurinn mestur níu mörk í stöðunni 17:8.
Hálfleikstölur voru 17:9 og útlitið því afar gott. Í síðari hálfleik hélt íslenska liðið uppteknum hætti og komst nokkrum sinnum tólf mörkum yfir.
Íslensku drengirnir slökuðu aðeins á klónni undir lokin án þess að þeir norsku hafi velgt þeim nokkuð undir uggum og niðurstaðan að lokum þægilegur sex marka sigur.
Ágúst Guðmundsson var markahæstur í liði Íslands með sex mörk. Garðar Ingi Sindrason bætti við fimm mörkum og Harri Halldórsson skoraði fjögur mörk.
Jens Sigurðarson fór á kostum í markinu og varði 13 skot. Var hann með rúmlega 48 prósent markvörslu.