Íslenska karlalandsliðið í handbolta skipað leikmönnum 18 ára og yngri leikur um þriðja sætið á EM í Podgorica í Svartfjallalandi eftir tap gegn Danmörku, 34:26, í undanúrslitum í dag.
Staðan í hálfleik var 18:9, Dönum í vil, og var íslenska liðið ekki líklegt til að jafna þrátt fyrir betri seinni hálfleik.
Ísland leikur annað hvort við Svíþjóð eða Ungverjaland um bronsverðlaun á sunnudag.
KA-maðurinn Dagur Árni Heimisson var markahæstur í íslenska liðinu með níu mörk og Ágúst Guðmundsson úr HK gerði fimm.
Stefán Magni Hjartarson hjá Aftureldingu og Jens Bragi Bergþórsson leikmaður KA komu næstir með fjögur hvor.