Sigurgeir Jónsson hefur skrifað undir samning við handknattleiksdeild Vals. Kemur hann inn í þjálfarateymi meistaraflokks kvenna, sem vann þrefalt á síðasta tímabili.
Sigurgeir var síðast þjálfari kvennaliðs Stjörnunnar, sem tapaði í bikarúrslitaleik fyrir Val á síðasta tímabili.
Auk þess að koma inn í þjálfarateymi Íslands-, bikar og deildarmeistara Vals, þar sem hann verður aðalþjálfaranum Ágústi Þór Jóhannssyni innan handar, mun Sigurgeir þjálfa 3. flokk kvenna ásamt Degi Snæ Steingrímssyni, sem einnig er í þjálfarateymi meistaraflokks kvenna.
Sigurgeir er reyndur þjálfari sem var lengi aðstoðarþjálfari kvennaliðs Fram auk þess að þjálfa yngri flokka hjá Fram og Stjörnunni. Þá hefur hann þjálfað yngri landslið kvenna.