Selfoss vann alla leiki sína á Ragnarsmóti kvenna í handbolta og stóð uppi sem sigurvegari mótsins í gær.
Selfoss mætti ÍBV í lokaleiknum sem Selfoss sigraði 27:24 eftir hörkuleik. ÍBV var yfir í hálfleik, 13:11, en Selfoss tók yfir um miðjan seinni hálfleik og sigraði að lokum. Perla Ruth Albertsdóttir var markahæst með 10 mörk fyrir Selfoss og þar á eftir var Katla María Magnúsdóttir með sjö.
Birna María Unnarsdóttir var markahæst hjá ÍBV með fimm mörk og Alexandra Ósk Viktorsdóttir og Birna Berg Haraldsdóttir skoruðu fjögur.
FH lenti í þriðja sæti og Víkingur í fjórða.
Marta Wawrzynkowska í ÍBV var valin besti markmaðurinn. Perla Ruth Albertsdóttir frá Selfossi var markahæst með 28 mörk á mótinu og var valin besti leikmaður mótsins. Sunna Jónsdóttir í ÍBV var valin besti varnarmaðurinn og Harpa Valey Gylfadóttir í Selfossi besti sóknarmaðurinn.