Stjörnumenn fóru fýluferð til Vestmannaeyja er liðið tapaði 33:31 fyrir Eyjamönnum í fyrsta heimaleik þeirra í úrvalsdeild karla í handknattleik á tímabilinu.
Stjörnumenn leiddu framan af en Eyjamenn tóku völdin þegar leið á fyrri hálfleikinn og voru sterkari aðilinn eftir það.
Gestirnir úr Garðabænum fóru frábærlega af stað og léku við hvurn sinn fingur í upphafi leiks. Þeir leiddu 0:3, 3:7 og 4:8 áður en Eyjamenn rönkuðu við sér og jöfnuðu í 8:8.
Stjörnumenn virtust ætla að herða tökin á ný en Eyjamenn náðu góðum kafla undir lok fyrri hálfleiksins og leiddu með tveimur mörkum þegar liðin gengu til búningsherbergja.
Jóel Bernburg hafði verið góður á línunni en gestirnir fundu línuna vel í upphafi leiks. Markvarsla liðanna var afleit í fyrri hálfleiknum en þó voru varamarkverðir liðanna límdir við bekkina. Sigtryggur Daði Rúnarsson lék vel í vörn og sókn og var markahæstur heimamanna með fjögur mörk ásamt fyrirliðanum Kára Kristjáni Kristjánssyni en saman þurftu þeir félagar einungis níu skot til að skora þessi átta mörk.
Stjörnumenn voru fljótir að jafna metin í upphafi síðari hálfleiks sem reyndist mjög jafn. Jóel Bernburg lék vel á línunni og Daníel Karl Gunnarsson í horninu en hjá Eyjamönnum lék Andri Erlingsson virkilega vel í sóknarleiknum.
Eyjamenn voru með tveggja marka forskot fyrir lokakaflann í leiknum en þá tóku Stjörnumenn leikhlé og töpuðu boltanum fljótlega eftir það. Eyjamenn töpuðu boltanum sömuleiðis en sókn Stjörnumanna eftir það var engu betri og kláraði Nökkvi Snær Óðinsson leikinn með því að koma Eyjamönnum þremur mörkum yfir, 33:30.