Íslendingalið Karlskrona vann fjórða sigur sinn á tímabilinu í sænsku úrvalsdeildinni í handknattleik karla þegar liðið fékk botnlið Skånela í heimsókn í kvöld. Lokatölur urðu 27:21.
Karlskrona er með níu stig í öðru sæti deildarinnar, stigi á eftir toppliði Ystad, eftir sigur kvöldsins.
Ólafur Andrés Guðmundsson skoraði tvö mörk fyrir Karlskrona en Dagur Sverrir Kristjánsson komst ekki á blað að þessu sinni. Þorgils Jón Svölu Baldursson var ekki í leikmannahópnum.
Einn annar Íslendingur var í eldlínunni í kvöld. Einar Bragi Aðalsteinsson lék með Kristianstad þegar liðið tapaði á útivelli fyrir Hallby, 29:23.
Einar Bragi skoraði tvö mörk fyrir Kristianstad, sem er í fjórða sæti með sjö stig.