Veszprém heldur góðu gengi sínu áfram í Meistaradeild Evrópu í handknattleik karla eftir útisigur á Pelister frá Norður-Makedóníu, 30:23, í kvöld.
Vezprém er á toppi A-riðilsins með 10 stig eftir sex leiki.
Aron Pálmarsson spilaði sinn fyrsta leik í sjö ár fyrir Vezprém en hann gekk í raðir félagsins á ný á dögunum. Hvorki hann né Bjarki Már Elísson skoruðu fyrir ungverska liðið.
Magdeburg mátti þá þola tap fyrir Barcelona, 32:26, í Barcelona í kvöld.
Magdeburg hefur farið afleitlega af stað í Meistaradeildinni en liðið er með þrjú stig í sjöunda og næstneðsta sæti eftir sex leiki. Barcelona er hins vegar á toppnum með 12 stig, fullt hús.
Gísli Þorgeir Kristjánsson skoraði þrjú mörk fyrir Magdeburg en Ómar Ingi Magnússon aðeins eitt.