Fram og Valur skildu jöfn, 31:31, í æsispennandi og bráðskemmtilegum leik í áttundu umferð úrvalsdeildar karla í Framhöllinni í Úlfarsárdal í kvöld.
Fram er eftir jafnteflið áfram í fimmta sæti en nú með níu stig. Valur heldur þá þriðja sætinu en er nú með tíu stig.
Heimamenn í Fram byrjuðu leikinn betur og náði þriggja marka forystu, 6:3, þegar tæpar átta mínútur voru liðnar af leiknum. Valsmenn náðu þá vopnum sínum og voru búnir að jafna metin í 7:7 aðeins fimm mínútum síðar.
Eftir það var lítið sem skildi liðin að og varð forystan ekki meiri en tvö mörk, sem Valur náði tvívegis er liðið komst í 8:10 og 13:15.
Eftir bráðskemmtilegan fyrri hálfleik var það Valur sem var einu marki yfir, 16:17, eftir að Úlfar Páll Monsi Þórðarson skoraði úr vítakasti undir blálok hálfleiksins.
Úlfar Páll var búinn að skora sex mörk í fyrri hálfleik líkt og Reynir Þór Stefánsson í liði Fram.
Framarar hófu síðari hálfleikinn af miklum krafti og komust fljótlega í 21:19 en aftur var Valur mjög snöggur að jafna metin í 22:22.
Heimamenn bættu þá enn frekar í og náðu fjögurra marka forystu í fyrsta sinn í leiknum í stöðunni 28:24.
Framarar voru í kjölfarið með góða stjórn á leiknum um stund en þegar skammt var eftir var sem einhver skrekkur kæmi í heimamenn á meðan gestirnir fundu loks dampinn í síðari hálfleik. Björgvin Páll náði nokkrum góðum vörslum, vörnin fór að standa betur og sóknarleikurinn að smella.
Valsarar söxuðu í sífellu á forskot Framara og voru búnir að jafna metin í 31:31 þegar tæplega tvær mínútur voru eftir.
Hvorugu liðinu tókst að bæta við marki eftir æsispennandi lokamínútur og reyndist jafntefli því niðurstaðan í stórskemmtilegum leik.
Úlfar Páll var markahæstur í leiknum með tíu mörk fyrir Val og Reynir Þór var markahæstur hjá Fram með sjö mörk.
Björgvin Páll Gústavsson varði 15 skot í marki Vals og var með tæplega 33 prósent markvörslu. Arnór Máni Daðason varði níu skot í marki Fram.