Mætum liði úr efstu hillu

„Verkefnið leggst vel í okkur. Við gerum okkur allir grein fyrir því hvernig síðasti leikur fór á móti þeim og okkur klæjar í fingurna að fá að sýna betri leik og mæla okkur aftur við þá,“ sagði Sigursteinn Arndal, þjálfari karlaliðs FH í handbolta, í samtali við miðla félagsins fyrir leik gegn Gummersbach í Evrópudeildinni.

FH steinlá fyrir gamla þýska stórveldinu í Kaplakrika í síðasta mánuði, 21:40. Liðin mætast aftur í Gummersbach klukkan 17.45 í dag.

„Það var margt sem við vorum ósáttir við í síðasta leik á móti þeim. Að sama skapi erum við auðmjúkir og gerum okkur grein fyrir því að við erum að mæta liði úr hæstu hillu,“ hélt Sigursteinn áfram.

Mikill skóli að spila á þessu sviði

Spurður hvert markmið FH væri í leiknum sagði hann:

„Það er í rauninni það sama og fyrir alla hina Evrópuleikina. Við erum að taka þátt í þessari keppni til þess að stækka sem einstaklingar og lið. Við ætlum að reyna að taka sem mest út úr þessu. Við höfum fundið það að þátttaka okkar í þessari keppni er búin að hjálpa okkur heima fyrir.

Við erum orðnir þéttari og öruggari með margt í okkar leik. Þess vegna erum við ánægðir með að fá að mæla okkur aftur við þá á morgun [í dag].“

Sigursteinn kvaðst þá ánægður með unga leikmenn sína.

„Já, það er engin spurning. Það er mikill skóli að taka þátt í keppni sem þessari og spila á þessu sviði. Ungu mennirnir hafa tekið framförum en mér finnst fyrst og síðast sem liðið sé búið að bregðast ótrúlega vel við og bæta sig milli leikja.“

• Blogga um frétt