„Mikill heiður að fá að keppa sem Bandaríkjamaður á landsmóti“

Þegar Alicia Flanigan var tíu ára sendu foreldrar hennar hana í sumarbúðir í Bandaríkjunum og þar sem hún kynntist og féll fyrir íslenska hestinum.

„Foreldrar mínir eru hesta unnendur en voru alltaf með stóra hesta. Svo kom íslenski hesturinn inn í líf okkar allra og þá var ekki aftur snúið. Þegar maður hefur setið silkimjúkt tölt þá nennir maður ekkert að fara aftur í brokkið,“ segir Alicia.

Alicia kolféll svo fyrir íslenska hestinum að í lok árs 2022 flutti hún tvítug frá Maine í Bandaríkjunum til Íslands til þess að starfa við og kynnast íslensku hestasamfélagi, en áður hafði hún reglulega komið yfir sumartímann til að starfa í kringum íslenska hestinn.

Samfélagið í Bandaríkjum vaxandi

Hestasamfélagið í Bandaríkjunum hefur farið vaxandi á síðustu áratugum en nú eru um 6.000 hestar á skrá og eru félagar í FEIF - International Federation of Icelandic Horse Associations yfir 800. Að hennar sögn er mikil nánd í hópnum vegna fjöldans.

„Það þekkja allir hvern annan en við erum dreifð víða um landið svo það er mjög langt á milli okkar. Ef þú vilt keppa á íslenska hestinum í Bandaríkjunum þarftu að vera tilbúin til að keyra í tuttugu tíma á mótssvæði, svo maður þarf að vera vel skipulagður fyrir ferðalagið.“

Fjölskyldan hennar hefur átt íslenska hesta í tólf ár. Ljósmynd/Aðsend

Alicia segist lánsöm með að áhugi hennar og foreldra hennar á hestum fari saman. Þau hafi hiklaust stutt við ástríðu hennar á íslenska hestinum og voru dugleg að keyra hestana hennar á milli móta.

„Þau keyrðu fjórum sinnum á ári fram og til baka um landið svo ég gæti verið að keppa. Svo ég hef verið einstaklega heppin með þeirra stuðning.“

Síðustu ár hafa vinsældir íslenska hestsins aukist vegna þess hversu fjölhæfir og harðgerðir þeir eru og sést það á þátttöku í keppnum.

„Það er byrjað að nota hann í þolreiðum og hefur hann verið að standa sig mjög vel á því sviði. Íslensku hestarnir hafa verið að stíga upp á stigatöflum í þeim keppnum svo það verður spennandi að fylgjast með þróuninni þar.“

Sumur á Íslandi

Sumarið 2017 þegar Alicia var fimmtán ára starfaði hún í tvo mánuði hjá Guðmari Þór Péturssyni, tamningarmanni og reiðkennara á Hestalandi í Borgarfirði. Foreldrar hennar þekktu Guðmar Þór vel, en hann hefur verið mikið að kenna í Bandaríkjunum.

„Foreldrar mínir treystu mér til að fara út og treystu honum mjög vel. Hann er virkilega góður í ensku sem hjálpaði mér auðvitað mikið þar sem ég var mjög ung. Þau á Hestalandi hugsuðu einstaklega vel um mig og fannst mér svo gaman að ég fór aftur næsta sumar.“

Síðan þá hefur Alicia starfað öll sumur á Íslandi, en hún var hjá Sigurði Sigurðarsyni á Þjóðólfshaga í þrjú sumur. Frá 2022 hefur hún búið á Íslandi og starfar nú í hestamannafélaginu Herði í Mosfellsbæ.

„Ég fór heim til Bandaríkjanna fyrr í sumar og var það í fyrsta skipti í langan tíma sem ég var eitthvað heima á sumrin. Ég eyddi bara alltaf vetrunum í kuldanum í Maine og flúði sumarhitann til Íslands.“

Ísland á öðru stigi

Hún segir fátt jafnast á við tilfinninguna að keppa á Íslandi. Mikil samheldni sé hjá keppendum og andrúmsloftið frábært.

„Ég elska andrúmsloftið í kringum mótin. Það er alltaf mikil spenna en allir eru alltaf hressir og það skapast mikil orka og jákvæðni. Keppnin á Íslandi er svo sterk og það er alltaf afrek ef maður kemst í úrslit í keppni.“

Stuttu fyrir landsmót frétti Alicia að hún hafi náð sæti í B-flokki fullorðna á landsmótinu. Hún hoppaði á tækifærið enda verið draumur í langan tíma.

„Það er mikill heiður að fá að keppa sem Bandaríkjamaður á landsmóti með allt þetta fólk í brekkunni. Ef hesturinn er stilltur þá er það bara bónus,“ segir hún.

Alicia og Feykir á brautinni á mánudaginn. Ljósmynd/Aðsend

Alicia fékk lánaðan hestinn Feyki frá Mosfellsbæ hjá dóttur yfirmanns síns, en keppnishesturinn hennar forfallaðist vegna meiðsla.

„Feykir er mjög einstakur hestur. En hann er notaður í öll verkefni í hesthúsinu, til að mynda sem lánshestur eða til að þjálfa ungu tryppin. Hann er sá sem við notum í allt og er alvöru íslenskur gæðingur.“

Hólar í haust

Alicia hefur starfað síðasta vetur hjá Eysteini Leifssyni, eiganda Export hesta í hestamannafélaginu Herði í Mosfellsbæ. Samhliða því starfar hún sjálfstætt og röltir á milli húsa með hnakkinn sinn. Hún segir að samfélagið í Herði hafi verið tekið á móti henni með opnum örmum og verið henni til taks.

„Svo var ég bara að fá inngöngubréfið mitt í Háskólann á Hólum, en markmiðið mitt var alltaf að komast þar inn. Ég kom upprunalega til Íslands til þess að kynnast hestasamfélaginu, mennta mig og læra íslensku. Það að ég náði að komast inn er magnað. Þetta er bara draumur í dós.“

Eftir námið stefnir Alicia aftur heim til Bandaríkjanna en hún kveðst alltaf vilja halda í tenginguna við Ísland og fólkið sem hún hefur kynnst hér.

„Mig langar alltaf að geta komið til Íslands reglulega og keppa. En fyrst og fremst vil ég geta gefið eitthvað til baka til hestasamfélagsins heima.“

Alicia og keppnishesturinn hennar Hnokki frá Dýrfinnustöðum. Ljósmynd/Aðsend

• Blogga um frétt