Danska dómaraparið Mads Hansen og Martin Gjeding pantar sér líklega ekki ferð til Króatíu í sumar til að eyða sumarfríinu því Króatar eru vægast sagt brjálaðir út í þá en Danirnir dæmdu leik þeirra gegn Þjóðverjum í milliriðli á heimsmeistaramótinu í handknattleik í gærkvöld.
Þjóðverjar höfðu betur í æsispennandi leik 22:21 og tryggðu sér þar með sæti í undanúrslitunum á mótinu en tapið gerði það að verkum að Króatar eiga ekki möguleika á að endar ofar en í 5. Sæti á HM.
Króötunum fannst mjög á sig hallað í dómgæslu Dananna og hinn reyndi þjálfari þeirra, Lino Cervar, sparaði ekki stóru orðin í viðtölum eftir leikinn.
„Dómararnir stálu sigrinum frá okkur. Það á að refsa þeim eins hart og mögulegt er. Þeir ættu ekki að fá að dæma meira og þeir ættu að fara í fangelsi fyrir þeirra frammistöðu. Ég veit ekki hvar ég á að byrja því það var í svo mörgum tilvikum sem við vorum sviknir. Allur heimurinn sá þetta,“ sagði Cervar í viðtali við króatíska fjölmiðilinn Vevernji List eftir leikinn.
Igor Vori, fyrrverandi fyrirliði króatíska landsliðsins og nú aðstoðarmaður Cervars, tók í sama streng og landsliðsþjálfarinn.
„Þetta var skömm fyrir íþróttina. Þegar markvörður þýska liðsins, Silvio Heinevetter, kemur til mín eftir leikinn og biðst afsökunar þá er eitthvað rangt,“ sagði Vori.