Sannfærandi ungverskur sigur í riðli Íslands
Setja bókamerki
Ungverjaland átti ekki í miklum vandræðum með að vinna Suður-Kóreu í fyrsta leik D-riðils Íslands á HM karla í handbolta í Svíþjóð og Póllandi í dag, en riðilinn er leikinn í Kristianstad í Svíþjóð. Urðu lokatölur 35:27.
Eins og við var að búast fór ungverska liðið betur af stað og áttu Suður-Kóreumenn í erfiðleikum með að finna glufur á sterkri ungverskri vörn. Hinum megin áttu Ungverjar í minni vandræðum með að finna leiðir framhjá mjög framliggjandi vörn Suður-Kóreu.
Það gekk hins vegar illa fyrir Ungverja að hrista Suður-Kóremenn almennilega af sér framan af leik og var staðan 10:7 þegar fyrri hálfleikur var rúmlega hálfnaður.
Þá fóru Suður-Kóreumenn að gera sig seka um slæm mistök í sókninni og Ungverjar refsuðu hinum megin. Ungverjar bættu örugglega í forskotið eftir því sem leið á hálfleikinn og að lokum munaði tíu mörkum í hálfleik, 21:11.
Suður-Kóreumenn neituðu að gefast upp í seinni hálfleik og með fínni byrjun tókst Asíuþjóðinni að minnka muninn í sjö mörk, 25:18, þegar seinni hálfleikur var tæplega hálfnaður. Þá tóku Ungverjar leikhlé og náðu aftur meiri tökum á leiknum. Þegar rúmlega tíu mínútur voru eftir var staðan 28:19 og ljóst í hvað stefndi.
Seung Park, Taehyun Ha og Jeongu Kang skoruðu fimm hver fyrir Suður-Kóreu.
Þrátt fyrir að fjölmargir íslenskir stuðningsmenn hafi verið á bandi Suður-Kóreu í höllinni í Kristianstad, reyndist ungverska liðið einfaldlega of sterkt.
Ljóst er að Ísland á erfiðan leik fyrir höndum gegn Ungverjalandi, en ef allt er eðlilegt ætti Suður-Kórea ekki að vera mikil fyrirstaða fyrir Ísland í lokaleik riðilsins.
Vandræði með vatn í Bolungarvík
„Skjálftaklessa á milli Grímseyjar og Öxarfjarðar“
„Einhverjir töfrar sem gerast“
Ránið var framið í strætóskýli
Taldi betra fyrir drengina að deyja
Traust til kvenleiðtoga fer minnkandi
Sleginn yfir grófri framkomu gegn fjölskyldunni
Komu fólki til aðstoðar í Ísafjarðardjúpi