Danmörk tryggði sér í kvöld heimsmeistaratitilinn í handknattleik karla með því að hafa betur gegn Frakklandi, 34:29, í úrslitaleik HM 2023 í Stokkhólmi í Svíþjóð. Danir hafa nú orðið heimsmeistarar þrisvar sinnum í röð.
Danir hófu leikinn stórkostlega þar sem Niklas Landin var í miklu stuði í markinu og allar sóknir liðsins enduðu með marki.
Staðan var orðin 6:2 snemma leiks og varð munurinn mestur fimm mörk, 12:7, um miðjan fyrri hálfleik.
Þá tóku Frakkar mjög vel við sér og minnkuðu muninn niður í aðeins eitt mark 16:15, sem voru hálfleikstölur.
Í upphafi síðari hálfleiks var mikið jafnræði með liðunum en Danir voru þó ávallt skrefi framar.
Þegar líða tók á hálfleikinn bætti Danmörk aðeins í og náði fjögurra marka forystu, 30:26, þegar skammt var eftir.
Frakkar minnkuðu muninn niður í tvö mörk, 31:29, en komust hins vegar ekki nær þar sem Danir skoruðu síðustu þrjú mörk leiksins og unnu að lokum frækinn fjögurra marka sigur.
Danmörk er fyrsta liðið sem vinnur þrjá heimsmeistaratitla í röð eftir að hafa hrósað sigri á HM 2021 í Egyptalandi og HM 2019 í Danmörku og Þýskalandi.
Rasmus Lauge var markahæstur í leiknum með tíu mörk fyrir Danmörku. Simon Pytlick var ekki langt undan með níu mörk.
Nedim Remili var markahæstur í liði Frakklands með sex mörk. Dika Mem bætti við fimm mörkum.