Íþróttir | HM í handbolta | mbl | 3.12.2023 | 9:00

Óskaði þess svo innilega

Sunna í hasar gegn Frakklandi í gær. Ljósmynd/Jon Forberg

Sunna Jónsdóttir er önnur tveggja leikmanna íslenska landsliðsins í handbolta sem hafði áður leikið á stórmóti, áður en íslenska liðið hóf leik á HM með leik gegn Slóveníu á fimmtudaginn var.

Sunna var í íslenska hópnum sem lék á EM í Danmörku árið 2010. Sunna var þá 22 ára og á meðal yngstu leikmanna íslenska liðsins. Nú er hún fyrirliði og næstelst á eftir Hildigunni Einarsdóttur.

„Ég var í allt öðru hlutverki þá. Ég var ein af þeim yngri og horfði upp til þeirra eldri. Ég reyni nú að vera í hlutverki þeirra eldri, miðla, gefa af mér og nýta reynsluna til að hjálpa.

Sunna ræðir við mbl.is. Ljósmynd/Jon Forberg

Leikmenn glíma við alls konar tilfinningar. Stundum er þetta erfitt og maður er stundum fullur sjálfstrausts en missir það síðan. Við reynum að lifa í núinu og vera samstilltur og góður hópur,“ sagði Sunna við mbl.is á liðshóteli landsliðsins í Stafangri í Noregi.

Sunna var með á EM 2010, en var síðan ekki valin í hópanna fyrir HM ári síðar og EM 2012. Hún hefur því þurft að bíða lengi eftir að fá að loks spila á öðru stórmóti.

„Ég var ekki valin í seinni tvo hópana. Ég var í æfingahópnum en var ekki valin. Það voru svo ótrúlega góðir leikmenn sem voru á undan mér þá. Ég var mjög svekkt. Ég hef alltaf elskað þessa íþrótt og maður fann á fyrsta mótinu að maður vildi meira af þessu.

Ljósmynd/Jon Forberg

Samkeppnin var gríðarlega mikil þá og er það núna aftur. Núna erum við loksins komin aftur á þennan stað. Ég hef fulla trú á að þetta sé eitthvað sem koma skal til frambúðar,“ sagði Sunna.

Hún missti ekki trúna á að leika á stórmóti á nýjan leik, þrátt fyrir langa bið. „Mig dreymdi um það, vonaði það og óskaði þess svo innilega. Eftir að ég varð lykilmaður í liðinu hef ég alltaf haft það bak við eyrað. Síðan Arnar tók við höfum við verið að horfa á EM 2024 og við erum á góðri leið með að ná því markmiði.

Það var svo ótrúlega mikil gulrót fyrir okkur að fá boðssæti á þessu HM, sem við áttum algjörlega skilið. Við ætlum að nýta hana eins vel og við getum,“ sagði Sunna Jónsdóttir.