Að sjálfsögðu vil ég spila úti

Markvörðurinn Hafdís Renötudóttir er mætt á sitt fyrsta stórmót með íslenska landsliðinu í handbolta, en hún skipar markvarðarpar íslenska liðsins með Elínu Jónu Þorsteinsdóttur.

Hafdís var í byrjunarliði Íslands gegn Slóveníu í fyrstu umferð D-riðils, eftir mjög góða frammistöðu gegn Noregi og Angóla í Posten Cup í aðdraganda heimsmeistaramótsins.

Hafdís ræðir við mbl.is. Ljósmynd/Jon Forberg

„Ég upplifði það þannig að ég spilaði vel gegn Noregi og Angóla. Þegar uppi er staðið snýst þetta samt um að standa sig í alvöruleikjunum og nú er það undir okkur komið að vera klárar,“ sagði Hafdís, sem var ekki sérlega sátt við eigin frammistöðu gegn Slóveníu, þar sem hún var tekin af velli um miðjan fyrri hálfleik.

Ísland lenti mest sjö mörkum undir í leiknum, en sýndi mikinn styrk í að minnka muninn í eitt mark í seinni hálfleik, áður en Slóvenía tryggði sér sigur með góðum lokakafla. „Þetta var skemmtilegur leikur og það var gaman að fylgjast með góðu gengi, en svo var erfitt að tapa þessu í lokin.“

Hafdís Renötudóttir. Ljósmynd/Jon Forberg

Hafdís leikur í dag með Íslandsmeisturum Vals, en hún hefur einnig leikið með Fram og Stjörnunni hér á landi. Þá var hún um tíma á mála hjá SønderjyskE í Danmörku, Boden í Svíþjóð og Lugi í Noregi. Hún viðurkenndi að hugurinn leitar út og að góð frammistaða á HM geti hjálpað.

„Að sjálfsögðu vil ég spila úti og tækifærin eru til staðar á stóra sviðinu. Ég vona að mér gangi vel og eitthvað gott komi út úr því,“ sagði hún.

• Blogga um frétt