Auðvelt hjá Frökkum – Argentína stríddi Spáni

Frakkland og Spánn hófu keppni í milliriðlum HM 2023 í handknattleik kvenna með sigrum í kvöld.

Frakkar mættu Austurríki í Þrándheimi í Noregi í milliriðli 2 og lentu ekki í nokkrum vandræðum, unnu 41:27 eftir að hafa leitt með ellefu mörkum í hálfleik, 25:14.

Sarah Bouktit var markahæst í liði Frakka með sjö mörk.

Markahæst í leiknum var hins vegar Ines Ivancok með átta mörk fyrir Austurríki.

Með sigrinum fór Frakkland í efsta sæti milliriðils 2, þar sem liðið er með 6 stig. Austurríki er í fjórða sæti með 2 stig.

Argentína yfir í hálfleik

Í milliriðli 4 stóð Argentína vel í Spáni lengi vel en mátti að lokum sætta sig við 30:23-tap.

Argentína var með eins marks forystu, 12:13, í hálfleik en Spánverjar sýndu á klærnar í síðari hálfleik og unnu sjö marka sigur.

Maitane Echeverría var markahæst hjá Spáni með sjö mörk.

Giuliana Gavilan skoraði átta mörk fyrir Argentínu og var markahæst.

Spánn er á toppi milliriðils 4 með 6 stig en Argentína er í fimmta sæti án stiga.

• Blogga um frétt