Heimsmeistararnir kjöldrógu Angóla

Heimsmeistarar Noregs í handknattleik kvenna, sem Þórir Hergeirsson þjálfar, lentu ekki í nokkrum vandræðum með Angóla þegar liðin áttust við í fyrstu umferð milliriðils 2 á HM 2023 í Þrándheimi í kvöld.

Lauk leiknum með 37:19-sigri Noregs eftir að staðan hafði verið 20:9 í hálfleik.

Markahæst í liði Noregs var Camilla Herrem með sjö mörk.

Fjórir leikmenn Angóla voru svo jafn markahæstir. Marilía Quizelete, Albertina Kassoma, Azenaide Carlos og Chelcia Gabriel skoruðu allar þrjú mörk.

Noregur er á toppi milliriðils 2 með 6 stig líkt og Frakkland í sætinu fyrir neðan.

Angóla er á botninum án stiga.

Þægilegt hjá Hollendingum

Holland mætti Brasilíu í milliriðli 4 og vann þægilegan sigur, 35:27.

Dione Housheer var markahæst í liði Hollands með sex mörk.

Markahæst í leiknum var hins vegar Kelly de Abreu Rosa með sjö mörk fyrir Brasilíu.

Þar með er Holland á toppi milliriðils 4 með 6 stig líkt og Spánn í öðru sæti.

Brasilía er í fjórða sæti með 2 stig.

• Blogga um frétt