„Þetta var erfitt, en maður verður að halda áfram. Við ætlum að mæta grimmar í nýtt mót,“ sagði Elín Rósa Magnúsdóttir, leikmaður íslenska landsliðsins í handbolta, í samtali við mbl.is fyrir æfingu íslenska liðsins í Frederikshavn í Danmörku í gær.
Íslenska liðið rétt missti af sæti í milliriðli í Þrándheimi í Noregi og fór þess í stað til Danmerkur í keppni um Forsetabikarinn, 25.-32. sæti.
Elín og samherjar hennar í íslenska liðinu fengu smá tíma til að sleikja sárin, áður en næsta verkefni tók við.
„Ég fékk mikið af skilaboðum, en þau voru öll jákvæð. Maður verður að taka þau til sín og horfa á það jákvæða og halda áfram.
„Það er fínt að tala um það við einhvern. Ég get t.d. alltaf talað við Lilju og Þóreyju sem spila með mér í Val og í rauninni allar í liðinu og svo er það auðvitað mamma,“ sagði Elín um hvernig hún jafnar sig eftir erfiða leiki.