Fæ ótrúlegt en satt aldrei nóg

„Ótrúlegt en satt þá fær maður einhvern veginn aldrei nóg,“ sagði Sandra Erlingsdóttir, landsliðskona í handbolta, í samtali við mbl.is þegar hún ræddi um ást fjölskyldunnar á íþróttinni.

Móðir hennar Vigdís Sigurðardóttir er fyrrverandi landsliðskona og faðir hennar Erlingur Richardsson er á meðal fremstu handknattleiksþjálfara Íslands.

Kærastinn Daníel Þór Ingason er atvinnumaður í Þýskalandi og hefur verið viðloðandi landsliðið undanfarin ár. Þá eru yngri bræður hennar efnilegir handboltapeyjar í Vestmannaeyjum.

Sandra Erlingsdóttir er í stóru hlutverki í landsliðinu. Ljósmynd/Jon Forberg

„Þetta er það sem lífið gengur út á einhvern veginn. Það er talað um lítið annað, en svo er það misjafnt hvað maður vill spjalla mikið eftir leiki og það er virt.

Þau skynja á mér fyrstu sekúndurnar í símtölum hvort ég vilji tala um leikinn sem var sama kvöld eða ekki,“ sagði Sandra létt og hélt áfram:

„Þetta er áhugamál sem við deilum öll og það er ótrúlega gaman. En svo finnst okkur líka mjög gaman að vera saman og hugsa um eitthvað allt annað,“ sagði Eyjakonan.

• Blogga um frétt