Man lítið eftir hvað tók við

Ísland tók þátt á HM í mánuðinum. mbl.is/Eggert Jóhannesson

Eftir tæpar þrjár vikur í Danmörku og Noregi að flytja fréttir af íslenska kvennalandsliðinu í handbolta er ofanritaður ansi glaður í bragði þessa dagana að soga í sig jólastemninguna hér á landi eftir vel heppnaða ferð.

Af fimm íslenskum fjölmiðlum sem sóttu HM voru aðeins tveir sem fylgdu liðinu alla leið til Frederikshavn í Forsetabikarinn, sem íslenska liðið vann með glæsibrag. Þeirra missir og vel gert landsliðskonur!

Vegna verkfalla og óveðurs tók það heila 26 tíma að komast heim í Laugardalinn frá hinum ágæta bæ sem Frederikshavn í Norður-Danmörku er. Hófst hún klukkan 3 um nótt og lauk klukkan 5 næsta morgun.

Eftir 26 klukkutíma, þrjár flugferðir, lestarferð, endalausa bið, engan svefn og keyrslu heim man bakvörður dagsins lítið eftir því hvað tók við þegar heim var komið.

Allt var þetta 100% þess virði til að gefa glæsilegu landsliði okkar, sem er á mikilli uppleið, þá umfjöllun sem það á skilið. Lítum líka á björtu hliðarnar; það varð til bakvörður úr ferðasögunni minni.