Svekktur að vinna ekki

Orri Freyr Þorkelsson, Ýmir Örn Gíslason og Viggó Kristjánsson spiluðu allir vel í gærkvöldi. mbl.is/Eggert Jóhannesson

Ísland gerði í gærkvöldi jafntefli við Svíþjóð, 31:31, í vináttuleik karla í handbolta í Kristianstad. Var leikurinn liður í undirbúningi beggja liða fyrir lokamót HM en Ísland leikur fyrsta leik gegn Grænhöfðaeyjum næstkomandi fimmtudag í Zagreb.

Leikmenn og þjálfarar íslenska liðsins voru svekktir með að missa leikinn niður í jafntefli í lokin en Ísland var með 31:29-forskot þegar rétt rúmar tvær mínútur voru til leiksloka. Svíar skoruðu tvö síðustu mörkin og tryggðu sér jafntefli.

Frétt af mbl.is

Jafnt í spennuleik í Kristianstad

„Strax eftir leik er ég svekktur að vinna ekki. Við vorum með tækifæri til þess undir lokin. Það voru einhverjar sveiflur í þessu. Það var eitthvað gott og annað sem við þurfum að gera betur. Við kíkjum á það og reynum að laga þessa hluti fyrir laugardaginn (morgundaginn),“ sagði landsliðsþjálfarinn Snorri Steinn Guðjónsson í samtali við Morgunblaðið eftir leik en liðin mætast aftur í Malmö á morgun, laugardag.

Góð sókn en lengi til baka

Sóknarleikur Íslands gekk vel stóran hluta leiks. Ellefu íslenskir leikmenn komust á blað og hinn magnaði Andreas Palicka, sem hefur oft verið Íslendingum erfiður, varði lítið í sænska markinu.

„Það voru margir sem sýndu góða frammistöðu og margt gott sem ég sá. Ég var ánægður með varnarleikinn framan af, þegar við náðum að skila okkur í vörn. Ég er verulega ósáttur með hvernig við skiluðum okkur til baka og fengum klaufaleg mörk í bakið,“ sagði Snorri Steinn.

Viðtalið við Snorra Stein má lesa í heild sinni í Morgunblaðinu í dag.