Tilbúinn en aðeins of seint fyrir HM

Sænski handknattleiksmaðurinn Felix Claar hefur jafnað sig af meiðslum og er klár í slaginn með Þýskalandsmeisturum Magdeburg á nýjan leik.

Félagið skýrði frá þessu í dag en batinn kom aðeins of seint til þess að Claar yrði valinn í sænska landsliðið sem hefur keppni á heimsmeistaramótinu í vikunni. Svíar mæta Japan í fyrsta leik sínum á HM á fimmtudagskvöldið.

Michael Apelgren, þjálfari Svía, gæti þó kippt honum inn í hópinn eftir að mótið hefst. Claar er 27 ára gamall og hefur skorað 196 mörk í 74 landsleikjum.

Hann hefur verið í nokkuð stóru hlutverki þar sem miðjumaður og spilað með sænska liðinu sem hefur fengið þrenn verðlaun á stórmótum á undanförnum fjórum árum.

Þetta eru góðar fréttir fyrir lið Magdeburg sem hefur verið með langan sjúkralista undanfarnar vikur og m.a. er Ómar Ingi Magnússon frá keppni um þessar mundir.

• Blogga um frétt