Segir Egypta besta í milliriðli Íslands

Egyptar eru sigurstranglegastir í milliriðli heimsmeistaramóts karla í handknattleik sem leikinn verður í Zagreb.

Þetta segir Serbinn reyndi Veselin Vujovic, stórskytta í liði Júgóslavíu á árum áður og nú þjálfari liðs Katar sem hefur keppni á HM í dag gegn Frökkum.

Vujovic segir í ítarlegu viðtali við Handball Planet að Egyptar séu alltaf hættulegir andstæðingar en fari allt eftir bókinni í riðlum G og H verða Ísland, Slóvenía, Króatía og Egyptaland í hörðum slag í milliriðli um tvö sæti í átta liða úrslitum.

„Þeir spila alltaf eins, hvort sem þeir eru í Kaíró, Zagreb eða Gautaborg. Þeir spila alltaf af mikilli ákefð og á sama stigi, öfugt við mörg önnur lið. Engin lið óttast þá, þannig að það þvælist ekki fyrir þeim, en þetta er gott lið.

Egyptar leika gríðarlega sterkan varnarleik og fínan sóknarleik. Ef markverðirnir þeirra eru í stöði eru þeir afar hættulegir og geta sigrað hvaða lið sem er.

Þeir munu valda Íslendingum, Slóvenum og Króötum miklum vandamálum. Ég tel að Egyptar séu sigurstranglegastir í þessum milliriðli," segir Veselin Vujovic, næstelsti þjálfarinn á HM, á eftir Alfreð Gíslasyni.

• Blogga um frétt