Íþróttir | Körfubolti | mbl | 6.9.2017 | 21:44

Sýndum okkar bestu hliðar

Jón Arnór Stefánsson sækir að körfunni og Tuukka Kotti er til varnar. Jón Arnór skoraði 13 stig í kvöld. AFP

Vonbrigði voru Jóni Arnóri Stefánssyni efst í huga eftir ósigurinn gegn Finnum (83:79) á blaðamannafundi eftir leikinn, en um leið sagði hann að í dag hefði liðið sýnt sínar bestu hliðar. Craig Pedersen, þjálfari liðsins, sagði á blaðamannafundinum að það ætti ekki að koma á óvart að Ísland hefði tapað öllum sínum leikjum á tveimur stórmótum í röð, það teldust frekar undur og stórmerki í hvað mörgum þeirra Ísland hefði átt möguleika til að ná sigri á lokamínútunum, sérstaklega í Berlín.

Jón Arnór Stefánsson sagði á blaðamannafundinum eftir leikinn við Finna að hann væri stoltur af því hvernig liðið lék í kvöld. „Menn lögðu allt í leikinn,“ sagði hann. „Þetta hefur verið erfitt mót fyrir okkur. Ég held að í dag höfum við sýnt okkar bestu hliðar. Því miður náðum við ekki að sigra, það var ætlunin, en það tókst ekki alveg. En ég er stoltur af liðinu og stuðningnum, en vonbrigði að sigra ekki.“

Pedersen tók undir orð Jóns Arnórs. „Mörg lið ættu erfitt með að rífa sig upp eftir fjóra afgerandi ósigra í röð, en þetta lið heldur bara áfram að berjast og berjast,“ sagði hann. „Ég held að leikmönnunum hafi tekist vel upp, en við gerðum nokkur lykilmistök. Munurinn er sá að þeir eru með framtíðarstjórstjörnu í NBA, sem getur náð góðum skotum í erfiðri stöðu þegar allt er undir í lokin. Við áttum kannski aðeins erfiðara með að ná opnum skotum eins og þeir gerðu undir það síðasta. En samt áttum við okkar möguleika og börðumst í 40 mínútur.“

Pedersen kvaðst vilja bæta því við að stemmingin í höllinni hefði verið geggjuð. „Það er ótrúlegt hvernig tveir stuðningsmannahópar geta runnið saman,“ sagði hann. „Það var dásamlegt að verða vitni að því. Auðvitað hefðum við viljað standa uppi sem sigurvegarar, en við verðum að halda áfram að berjast.“

Ítalskur blaðamaður spurði Pedersen hvort hann vildi segja eitthvað um dómgæsluna um miðbik fjórða leikhluta þegar leikurinn snerist við og Finnar náðu forustunni af Íslendingum.

„Ég held að það hafi alla vega gerst tvisvar að brotið var á okkar manni þegar hann keyrði upp að körfunni án þess að það væri dæmt,“ sagði Pedersen. „Síðan kom minni snerting hinum megin og þá var dæmt. Ég segi ekki að við höfum tapað vegna þess, en ég skil ekki að línan, sem þeir draga, geti breyst svona mikið á tíu sekúndum. Þetta var á mikilvægum punkti í leiknum og við gerðum þau andlegu mistök að tala of mikið við dómarann, sem leiddi til þess að við fengum tæknivillu. Í Finnlandi með 12 þúsund stuðningsmenn að baki máttum við ekki við því veita þeim aukinn kraft og þetta var alls ekki rétti tíminn til þess. “

Íslenska liðið hefur brennt sig á því á mótinu til þessa að mæta ekki tilbúið til leiks í upphafi þriðja leikhluta. Sú var ekki raunin nú. Pedersen sagði að liðið hefði ekki verið jafn lengi í búningsklefanum í hálfleik að þessu sinni, án þess að hann vissi hvort það væri ástæðan. „Leikmennirnir settust ekki niður í hlénu, við fórum inn, töluðum saman í eina mínútu og fórum út,“ sagði hann. „Kannski hjálpaði það.“

Pederson og Jón Arnór voru beðnir að gera upp mótið eftir lokaleikinn.

„Í fyrsta lagi vil ég segja að það er stórkostlegur árangur bara að hafa komist hingað, fyrir okkur og Ísland,“ sagði Jón Arnór. „Ég held að það sé ekki áfall fyrir okkur að hafa ekki unnið leik á tveimur stórmótum í röð, ef maður á að vera hreinskilinn, og ég held að allir séu sammála um það. Ef ég að gera upp þetta mót, þá mun ég taka þennan leik með mér, andrúmsloftið hér og mér mun örugglega líða betur á morgun þrátt fyrir tapið. Stemmingin var ótrúleg í kvöld, við lékum mjög vel. Ég held að allir hafi lagt sitt af mörkum eins og við töluðum um. Stundum vantaði framlag frá leikmönnum og við áttum í vandræðum með að spila góðan körfubolta í fjóra leikhluta eins og við höfðum stefnt að á mótinu, en við náðum því í kvöld, jafnvel þótt við ynnum ekki, og ég er stoltur af því. Við okkur var oft skellt á rassinn, töpuðum hverjum leik með þrjátíu, það þarf mikinn kjark og stórt hjarta til að rífa sig upp, horfa í spegilinn og reyna að gera betur. Ég vildi að við hefðum unnið í kvöld, en vonandi kemur það seinna.“

Pedersen sagði að hann væri ánægður með liðið vegna þess að sama hver staðan væri léki liðið með hjartanu í 40 mínútur hvern einasta leik. „Staðan er einfaldlega sú að ef við tökum þá tólf leikmenn sem við höfum höfum við ekki hæfileikana til að halda í við suma andstæðingana, en við höldum áfram að berjast,“ sagði hann. „Eins og Jón Arnór sagði er það ekki stórkostlegt áfall að við höfum ekki unnið neinn af þessum tíu leikjum. Það ætti kannski frekar að koma á óvart í hversu mörgum þeirra við höfum átt möguleika undir það síðasta, sérstaklega í Berlín. En við verðum bara að halda áfram og reyna að sjá til þess að við náum því að sigra stærri körfuboltaþjóðir í framtíðinni.“