„Er að dýfa tánni í laugina“

„Nafnið mitt er komið inn í pottinn og með þessu erum við að reyna að fá athygli frá NBA-liðunum. Það má kannski orða þetta þannig að maður sé að dýfa tánni ofan í laugina,“ sagði körfuknattleiksmaðurinn Tryggvi Snær Hlinason í samtali við mbl.is en búið er að senda nafn hans inn fyrir nýliðavalið í NBA-deildinni sem verður í júní.

„Þegar nafnið er komið inn í pottinn þurfa liðin að skoða leikmanninn og ég fæ þá að vita hvað ég þurfi að bæta í leik mínum og það er mjög gott. Ég og umboðsmaðurinn höfðum samband við Valencia varðandi þessi mál og félagið samþykkti þetta,“ sagði hinn 21 árs gamli Tryggvi Snær, sem gekk í raðir spænska liðsins Valencia frá Þór Akureyri í fyrra. Tryggvi, sem er 2,16 metrar á hæð, gerði svokallaðan 2+2 samning við félagið sem þýðir að hann skrifaði undir samning sem gildir til tveggja ára með möguleika á framlengingu til tveggja ára.

Spurður hvort hann geri sér vonir um að komast í NBA-deildina í sumar sagði Tryggi Snær:

„Ég geri mér í raun litla grein fyrir því. Ég og umboðsmaðurinn ákváðum að senda nafn mitt inn og þá aðallega til að fá einhver svör um það í hvaða þáttum ég þarf að bæta mig í,“ sagði landsliðsmiðherjinn við mbl.is en hann sló í gegn með U-20 ára landsliðinu í úrslitakeppni Evrópumótsins í Grikklandi í fyrra og var valinn í úrvalslið mótsins.

• Blogga um frétt