Sigurður Gunnar færir sig um set

Körfuboltamaðurinn Sigurður Gunnar Þorsteinsson verður ekki í herbúðum Grindavíkur á komandi leiktíð. Þetta staðfesti hann í samtali við mbl.is í dag.

Sigurður lék með Grindavík síðasta vetur eftir þrjú ár í atvinnumennsku. Hann varð Íslandsmeistari með Grindavík árin 2012 og 2013 og bikarmeistari árið 2014. Grindavík féll hins vegar úr leik eftir einvígi við Tindastól í átta liða úrslitunum á síðasta tímabili. 

Sigurður, sem á 54 landsleiki að baki, segir óljóst hvar hann mun leika næsta vetur, en hann útilokaði ekki að það gæti verið erlendis en hann lék með Solna í Svíþjóð 2014-15 og með grísku liðunum Doxas og AEL næstu tvö tímabil þar á eftir.

Hann skoraði 12,8 stig, tók 8,8 fráköst og gaf 3,1 stoðsendingu að meðaltali í leik í 25 deildarleikjum á síðustu leiktíð. 

• Blogga um frétt