Enginn afsláttur á Hlíðarenda

„Það eru marg­ar ástæður fyr­ir því að ég ákvað að semja við Val,“ sagði körfuknatt­leik­skapp­inn Pavel Ermol­in­skij í sam­tali við mbl.is í Fjós­inu á Hlíðar­enda í dag. Pavel skrifaði und­ir tveggja ára samn­ing við Vals­menn en hann kem­ur til fé­lags­ins frá KR þar sem hann hef­ur orðið Íslands­meist­ari, und­an­far­in sex ár.

Frétt af mbl.is

Pavel til liðs við Vals­menn

„Þetta er góð áskor­un fyr­ir mig per­sónu­lega, að fara í lið sem þarf virki­lega á mér að halda. Þetta er lið sem vill gera bet­ur en und­an­far­in ár og er enn í mót­un, ólíkt KR sem dæmi, þar sem liðið er mjög heil­steypt. Það er allt til alls hérna á Hlíðar­enda og fé­lagið er full­fært um að taka næsta skref, það er mik­ill hug­ur í Vals­mönn­um, og allt verk­efnið hjá Vals­mönn­um í heild sinni er mjög spenn­andi og ég er spennt­ur að fá að taka þátt í þess­ari upp­bygg­ingu.“

Pavel hef­ur spilað með KR frá ár­inu 2013 þar sem hann hef­ur orðið Íslands­meist­ari sex ár í röð. Hann hef­ur verið al­gjör lyk­ilmaður í Vest­ur­bæn­um og viður­kenn­ir að hann hafi verið fast­ur í ákveðnum þæg­ind­aramma.

„Það er stór hluti af þessu, þetta var orðið þægi­legt í KR og ein­falt fyr­ir mig. Mitt hlut­verk hef­ur ekki breyst mikið í Vest­ur­bæn­um og það er í raun ein af ástæðum þess að ég ákvað að prófa eitt­hvað nýtt. Mig lang­ar að setja meiri pressu á sjálf­an mig og gera bet­ur og standa mig. Þetta sner­ist ekki um pen­inga og ég er mjög sátt­ur með samn­ing­inn sem ég fékk á Hlíðar­enda. Viðræður við KR fóru aldrei það langt að þetta var eng­inn sam­an­b­urður þannig séð, ég tók bara ákvörðun á ákveðnum tíma­punkti að fara.“

Pavel Ermol­in­skij varð Íslands­meist­ari með KR í sjö­unda sinn síðasta vor. mbl.is/Á​rni Sæ­berg

Umræða sem böggaði mig

Pavel var sterk­lega orðaður við brott­för frá KR, síðasta sum­ar, eft­ir að marg­ir lyk­il­menn liðsins hurfu á braut. Hann hélt hins veg­ar tryggð við liðið og skrifaði að lok­um und­ir nýj­an samn­ing við Vest­ur­bæj­ar­stór­veldið.

„Þetta voru bara hlut­ir sem maður heyrði af utan úr bæ og þessi umræða átti al­veg rétt á sér. Þetta böggaði mig ekk­ert sér­stak­lega en svo kom ein­hver púki upp í mér og þá fór þetta að bögga mig að heyra af því að maður nennti þessu ekki leng­ur og hvort maður hefði enn þá metnað fyr­ir körfu­bolt­an­um. Þetta var allt umræða sem átti fylli­lega rétt á sér en þá vildi ég fyrst og fremst sanna það fyr­ir mér, frek­ar en öðrum, að ég gæti enn þá spilað körfu­bolta og leitt mitt lið, án þess að fela mig í vél­inni sem KR er og var.“

Vals­menn hafa ekki riðið feit­um hesti frá karla­körf­unni á und­an­förn­um árum en liðið hafnaði í ní­unda sæti deild­ar­keppn­inn­ar á síðustu leiktíð. Pavel er ekki mætt­ur á Hliðar­enda til þess að tryggja sæti í úr­slita­keppn­inni held­ur til þess að berj­ast um titla.

„Það þarf ákveðin hug­ar­fars­breyt­ing að eiga sér stað á Hlíðar­enda og við sáum það ger­ast hjá kvennaliðinu þeirra í fyrra. Þetta þarf að ger­ast líka og ég sagði við þá að um leið og ég labba hérna inn þurfa all­ir að vera með og það verður eng­inn af­slátt­ur gef­inn. Við erum ekki að reyna að taka eitt skref áfram eða koma okk­ur inn í úr­slita­keppn­ina. Við erum að stefna á sig­ur núm­er eitt tvö og þrjú og allt annað eru von­brigði, það þarf svo bara að koma bet­ur í ljós hvort það geng­ur upp eða ekki,“ sagði Pavel í sam­tali við mbl.is.

• Blogga um frétt