Íslenska karlalandsliðið í körfubolta mátti þola 78:80-tap fyrir Kósóvó á útivelli í fyrsta leik liðsins í forkeppni heimsmeistaramótsins í kvöld. Kósóvó raðaði inn þriggja stiga körfum í seinni hálfleik sem varð íslenska liðinu að lokum að falli.
Hörður Axel Vilhjálmsson skoraði þrist í byrjun leiks en eftir það tók Kósóvó völdin og var með 6-11 stiga forskot út fyrsta leikhluta og framan af í öðrum leikhluta. Þá tók íslenska liðið við sér og fór að hitta betur og spila töluvert betri vörn.
Tryggvi Snær hitti betur undir körfunni, Sigtryggur Arnar datt í gang og Kári Jónsson skoraði flottar körfur. Að lokum munaði aðeins einu stigi á liðunum í hálfleik, 35:34.
Sigtryggur Arnar Björnsson skoraði þrjú fyrstu stig seinni hálfleiksins og kom Íslandi í 37:35, en þá fóru heimamenn að hitta ótrúlega vel fyrir utan þriggja stiga línuna og voru þeir því yfir eftir þriðja leikhluta, 60:57.
Ísland komst yfir snemma í fjórða leikhlutanum, 61:60, en Kósóvó svaraði með þriggja stiga og komst í 63:61. Í kjölfarið komst Kósóvó í 71:66 þegar þrjár mínútur voru til leiksloka. Íslenska liðið náði að minnka muninn undir lokin, en Kósóvó hélt út.
Kári Jónsson var stigahæstur í íslenska liðinu með 21 stig, Sigtryggur Arnar Björnsson gerði 20 og Tryggi Snær Hlinason skoraði 16.
Ísland mætir Slóvakíu í öðrum leik sínum í riðlinum næstkomandi sunnudag en Slóvakía vann Lúxemborg á heimavelli í kvöld, 73:65.
Leikmannahópur Íslands:
Breki Gylfason, Haukum
Gunnar Ólafsson, Stjörnunni
Hjálmar Stefánsson, Haukum
Hörður Axel Vilhjálmsson, Keflavík
Kári Jónsson, Haukum
Kristinn Pálsson, Njarðvík
Pétur Rúnar Birgisson, Tindastóli
Sigtryggur Arnar Björnsson, Grindavík
Tómas Þórður Hilmarsson, Stjörnunni
Tryggvi Snær Hlinason, Zaragoza
Ólafur Ólafsson, Grindavík
Ragnar Nathanaelsson, Val