Á ekki margar mínútur í úrslitakeppninni

„Ég er sár og svekktur með þetta tap því okkur langaði mikið að klára þessa seríu hérna í kvöld,“ sagði Arnar Guðjónsson, þjálfari Stjörnunnar, í samtali við mbl.is eftir 95:92-tap liðsins gegn Grindavík í fjórða leik liðanna í átta liða úrslitum Íslandsmóts karla í körfuknattleik í HS Orku-höllinni í Grindavík í kvöld.

Frétt af mbl.is

Grindavík knúði fram oddaleik gegn Stjörnunni

„Varnarleikurinn hjá okkur var ekki nægilega góður í kvöld og þeir skoruðu of auðveldlega á okkur. Á sama tíma voru Grindvíkingarnir mjög góðir og þeir fóru bara virkilega illa með okkur.

Við skoruðum nóg til þess að vinna leikinn en á sama tíma fengu þeirra bestu skotmenn of mikið af góðum skotum og það er eitthvað sem við þurfum að laga fyrir föstudaginn,“ sagði Arnar.

Þorleifur Ólafsson í baráttunni í fyrsta leik einvígisins í Garðabæ. Mbl.is/Sigurður Ragnarsson

Mikilvægt að nýta tækifærið

Stjarnan hefur farið illa með Grindavík í einvíginu í leikjum liðanna í Garðabæ.

„Þetta var bara ekki nægilega gott frá okkur öllum í kvöld en við fáum annan séns og okkur hlakkar til að nýta hann eins vel og hægt er.

Okkur hefur gengið vel gegn þeim í Garðabænum og eigum við ekki að vona að það verði eins á föstudaginn. Til þess þurfum fyrst og fremst að vera betri varnarlega en það var okkar stærsta vandamál í dag.“

Mun einvígið við Grindavík sitja í Garðbæingum, ef þeir komast áfram í undanúrslitin, þegar til lengri tíma er litið í úrslitakeppninni?

„Það er erfitt fyrir mig að svara þessar spurningu því ég á ekki margar mínútur sjálfur í úrslitakeppninni. 

Við erum með mjög gott teymi, styrktar- og sjúkraþjálfara, sem passar vel upp á strákana og að þeir fái góða hvíld. Vonandi sýnir það sig á föstudaginn,“ bætti Arnar við.

Frétt af mbl.is

Slagsmál í Grindavík

• Blogga um frétt