Gamla ljósmyndin: Rembingskoss
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Snæfell varð í fyrsta skipti Íslandsmeistari karla í körfuknattleik vorið 2010 þegar liðið lagði Keflavík að velli í úrslitarimmu 3:2. Hólmarar fóru til Keflavíkur og unnu þar magnaðan stórsigur í oddaleik liðanna í úrslitunum 105:69.
Er þetta eini Íslandsmeistaratitillinn hjá karlaliðinu til þessa en kvennaliðið vann þrjú ár í röð, 2014-2016. Bæði liðin voru undir stjórn Inga Þórs Steinþórssonar.
Snæfell vann tvöfalt keppnistímabilið 2009-2010 og gleðin var skiljanlega mikil þegar sigurinn var í höfn í Keflavík. Svo mikil að Jón Ólafur Jónsson smellti í fögnuðinum rembingskossi, á nef liðsfélaga síns Emils Þórs Jóhannssonar, að því er virðist.
Haraldur Guðjónsson, hag, myndaði fyrir Morgunblaðið og mbl.is á þessum árum og var réttur maður á réttum stað í fagnaðarlátunum. Meðfylgjandi mynd Haraldar af kossinum birtist í Morgunblaðinu föstudaginn 30. apríl árið 2010 ásamt ítarlegri umfjöllun.
Emil gaf tóninn í oddaleiknum þegar hann setti niður þriggja stiga skot í fyrsta sókn Snæfells í leiknum. Emil fékk mikið lof fyrir frammistöðu sína í vörninni gegn hinum sigursæla Keflvíkingi Gunnari Einarssyni.
Jón Ólafur var einn af heimamönnunum í liði Snæfells og var áberandi leikmaður í efstu deild á þessum árum.
„Maður var búinn að bíða allt of lengi eftir þessu. Maður var alveg búinn að læra nógu djöf... mikið af því að tapa í úrslitum,“ sagði Jón Ólafur m.a. í samtali við Morgunblaðið í Keflavík þegar sigurinn var í höfn. Vísar hann til þess að Snæfell hafði tvívegis komist í úrslit á árunum á undan eða 2005 og 2008. Í báðum tilfellum töpuðu Hólmarar fyrir Keflvíkingum í úrslitum.
Íslandsmóti karla í körfuknattleik 2021 lauk í gærkvöldi í Þorlákshöfn. Tiltölulega fámennt bæjarfélag, Þorlákshöfn, lék eftir afrek annars tiltölulega fámenns bæjarfélags, Stykkishólms, frá árinu 2010 og varð Íslandsmeistari.
Nokkrar skriður féllu á Vestfjörðum
„Allt í rusli“ við brúargerð á Vestfjörðum
Komið „meira púður“ í viðræðurnar
Sleginn yfir grófri framkomu gegn fjölskyldunni
Vandræði með vatn í Bolungarvík
